அன்பின் அறைகூவல்...

அன்பு....
தூரத்தே தொங்கும்
திராட்சைப்பழமாகிவிட்டது

சிலசமயம்.....
அடிநாதம் வாய்விட்டலறும்
ஆனாலும் கேட்பாரில்லை

சிலர் அதை......
அழகான இசையெனவும்
வர்ணிக்கிறார்கள்

வாய்விட்டுச் சிரித்து
நாளாயிற்று
என்னைப் புறக்கணித்தோர்
நான் சிரித்த இடங்களிலேயே
ஒப்பாரி வைக்கிறார்கள்

சில நேரம்.....
நான் அழுத
மலைப்பாறைகளின் கீழே
சில்லறையாய்க்
கொட்டி வைக்கிறார்கள்
சிரிப்புக்களை

என்னை......
அவன் ரசித்த கணங்கள்
கானகக் கிளைகளில்
தொங்கும் வௌவால்களாய்

ஏன்...
என்மீது இன்னும்
இடிவிழாமல்
அப்படியாவது
எட்டிப் பார்க்காமலா
போவார்கள்
அவனும்
கூட வரலாமென்ற
நப்பாசை எனக்கும்

வந்தால்.....
இருளில் ஒளி கிடைத்த
அதிசயத்தோடு வியக்கும்
என் விழிகள்
கோபமாய் வந்த வார்த்தைகளை
அளக்கத் தெரிந்த அவனுக்கு
என் அடிமன அன்பின்
அளவு தெரியாமல் போனதெப்படி

காற்றில்லா பூமியில்
வண்ணத்துப்பூச்சி இறகசைக்கும்
காற்றுப் போதும்
நாம் சுவாசிக்க
வா..............
நீயும் நானும் வாழ!!!

ஹேமா(சுவிஸ்)

	Tweet

காதல் துளிகள் (6)

காதல்....
இரவுகளைக் குழைக்க
உன்னால் மட்டும்தான்
சாத்தியமோ
ஏன்.......
என் இரவுகளையும்
சேர்த்தெடுத்துக் குழைத்துப்
பூசியிருக்கிறாய்
கருப்பா...!

உன்னைச் சுற்றும்
வண்ணத்துப்பூச்சி நான்
வானவில்லின்
பல நிறம் கொண்டவனே
என் நிறமறியாமல்
நீலத்தை வெள்ளையென்றும்
சிவப்பை இளமஞ்சளென்றும்
சொல்லி
கடைசியில்
கலவையில் குழம்பிய
நீ.....
அன்பு
கருப்பாய் இருப்பதாய்
கிறுக்க
நிறமற்றுக்கொண்டிருக்கிறது
என் இறக்கைகள் சுனாமியில் !

ஒரு உண்மை
சொல்ல'வா'...
உன் நினைவு
கண்ணை மறைக்க
சுட்டுக்கொண்டேன்
விரலில்
சுடவில்லை.....
உன் சொற்களைவிட
விரலும்
நானும்
உன்...
ஒற்றைச்சொல்லுக்காக
எரிந்தபடி !

ஒரு முறைக்கு மட்டுமே
ஏங்கும் மனம்
அதன்பின்
இன்னும் இன்னும்
எனத்
தணியாத தாகமாய்
தவிக்க வைக்கிறதே
உன் குரல்
ஞாபகத்தை அதிகமாக்கி
உரசிப்போகிறது
நீ....
முணுமுணுக்கும் பாடல்கள் !

மரமுதிர்த்த
மஞ்சள்
வீதி முழுதும்
உன் நினைவுகள்.

உன்னால்...
என் செல்லப் பெயர் எழுதிய
சருகொன்றைத்
தேடிக்கொண்டிருக்கிறேன்
இன்னும்!!!

ஹேமா(சுவிஸ்)

	Tweet

கொடுக்க'வா' குட்டிக் குருவி...

வந்து வந்து குந்திக்கொண்டிருக்கிறது
ஒரு குருவி
உண்டு கழித்த
நினைவுகளை மறக்காதோ.

பல்கனியில் தானியத்தை
பரப்பிவிட்டுக் காத்திருப்பேன்
அடிபட்டு
கொஞ்சிக் குலவி
சாப்பிடும் அழகை ரசிக்க
பசி போக்கிப் புசிக்க.

எச்சம் கழுவுவது
ரசனையை விட மோசமது
தமிழில் செல்லத்திட்டு வேறு
 'கக்கா இருந்தால்
சாப்பாடு போடமாட்டேன்
.......போ'.

மெல்ல மெல்ல
குவளைத் தேனீர்
என்னைச் சூடாக்க
இன்னும் பனி மழை
பூமியை வெள்ளைப்பூக்களால்
அலங்கரிக்க
குருவியோ குந்தியிருக்கிறது
பாவமென 
சற்றுத் தள்ளி
பரிதாபமாய்!!!

"கட்டித்தொங்கவிட உருட்டிய உணவு விற்பனையில்.பனிக்காலத்தில் பறவைகளுக்கும் உணவுத் தட்டுப்பாடு."

ஹேமா(சுவிஸ்)

	Tweet

கடந்த ஞாயிறு...

விரலிடுக்குகளில்
இடுக்கி வைத்திருந்த
ஒற்றைச் சூரியன்
காணாமல் போயிருந்தது.

குழந்தைச் சூரியனாய்
இருந்தபோதே
வானிடம்
திருடியிருந்தேன்.

முகில் பிளந்து
பொத்திக் காத்திருக்க
வானுக்கு
முண்டு கொடுக்கவென
கால் வளர்ந்த சூரியன்
காலில்லாக் கதிரையையும்
காவிப் போயிருந்தது.

பதைத்துத் தேடுகையில்
முழுச்சூரியனாய்
வானோடு
நடந்துகொண்டிருந்தது
நான் வளர்த்த சூரியன்.

சூரியனைத் தேடும்
விரல்களை
சமாதானம் செய்தபடியே
பக்கவாட்டில்
துளாவித் தேட
என் தலையைக்
கடந்து கொண்டிருக்கிறது
காலை வெயில்!!!

ஹேமா(சுவிஸ்)

	Tweet

திரண்ட தமிழ்...

இருப்பு......
இருப்பவர்க்கல்ல
அது இல்லாதவர்க்கே
அந்த இருப்பின் வலி தெரியும்.

இருப்பை மாற்றினால்தான்
வாழ்வென்றால்
அதை எதிர்ப்பது
புரட்சியென்றால்
செய்திடலாம்
அதைப் பலமுறை
மகிழ்ச்சியோடு.

ஈழம்....
என் தாயின் பிரசவம்
நமக்கான வலி
தலை சிதறிப் போனாலும்
எம் தலைமுறைகள்
மறவாது
பிணங்கள் தாண்டிய
இரத்தம் தோய்ந்த
எம் கால்களும் கூட.

எம் கால் பட்ட புழுதிகள்
காத்திருக்கும்
எமக்கான தேசத்தில்
இன்றும்....
இன்னும்....
வித்தாகிப் போனவர்கள்
வீரத்தைத் தந்தே போனார்கள்
இப்போதெல்லாம்
மரணங்கள் பயமில்லை
சலிப்புத்தான்.

குண்டுகள் விழுந்த தேசம்
குயில் கூவும் தேசமாகும்
சாவுகள் கண்ட பூமியில்
புதுப் பனைமரங்கள்கூட
சாமரம் வீசும்
என் தாய்க்கு
நித்தவிடியலில் விலாசமெழுதும்
நம் ஒற்றுமை.

கை கோர்ப்போம்
கனவுகளுக்கு உயிரூட்டுவோம்
ஈழம் மலரும்
தமிழனின் தலை நிமிரும்
நம்புவோம்
வாழ்க தமிழ்
வாழ்க மாவீரர்களின் தாகம்
தமிழரின் தாகம் தமிழீழத் தாயகம்
தனித்தமிழ் தாயகம் !!!

ஹேமா(சுவிஸ்)

	Tweet

நிலாக்குட்டி 2013 !

என் செல்லம் அன்பு நிலாக்குட்டி......... அன்போடும் பண்போடும் பல் கலைகளும் பெற்று வாழ 8 ஆவது இனிய நிறைவான பிறந்தநாள் வாழ்த்துக்கள்.நிலா வாலுக்கு செல்ல முத்தங்கள் நூறு...ஆயிரம் !  

ஹேமா(சுவிஸ்)

	Tweet